تابعنا

تذاكر الطيران

تذاكر الطيران

هجيب منين فلوس لتذكرة الطيران ؟؟!!! دى غالية جدا يا عم!!!!



اكتر حاجة بتقلق فى السفر هى تذكرة الطيران واحنا دايما عندنا ايمان ان تذكرة الطيران غالية جدا بس اكتشفت ان الموضوع سهل وبسيط وان فى تذاكر طيران رخيصة جدا .... بس محتاجة انك تدور عليها مش اكتر.


فى مواقع لا غنى عنها لما تيجى تدور على تذكرة طيران

مينفعش نتكلم فى الموضوع دة من غير ما نتكلم على موقع 

Skyscanner.com

الميزة فى الموقع دة انك لو عندك اجازة فى شهر واحد 2016 مثلا فهتقوله انا عاوز ارخص تذاكر فى الشهر دة من القاهرة مثلا وتسيب الوجهة فاضية فيجيبلك ارخص بلد ممكن تروحها فى الوقت دة


مش بس كدة انت ممكن تقوله دور على ارخص تذكرة طيران من اى مكان لاى حتة فى اى وقت فى السنة.... فمثلا ممكن تقوله دورلى على تذاكر طيران من القاهرة لاى حتة فى العالم فى اى وقت تشوفه ارخص .... فيعرضلك ارخص تذاكر موجودة خلال السنة اللى جاية ... فتبدا تظبط اجازتك عليها

او الخيار الافضل انك بدل القاهرة تقوله لا انا عاوز اشوف ارخص تذكرة من اى حتة فى مصر فيجيبلك حاجات ارخص كمان من الغردقة و شرم الشيخ ( لان السياحة هناك اكتر فالطيارات اكتر وارخص ) 




طب ايه السر فى ان التذاكر ديه رخيصة .... يعنى ب 700 جنيه رايح جاى لايطاليا ؟؟؟ ازاى !!!


السر يا سيدى ان فى شركات طيران متخصصة فى الطيران الرخيص ومش بس كدة دة فى كمان مطارات متخصصة انها تستقبل الطيران الرخيص دة وبيبقى الفلوس اللى بتدفعها شركة الطيران قليلة قبالتالى بتبقى التذكرة ارخص.



مش بس كدة كمان شركة الطيران بتبقى همها ان الطيارة تبقى مليانة ناس عشان تكسب .... فالتذكرة بيبقى غالبا عدد الشنط المسموحة ليك انك تاخدها محدود وكمان حجم الشنطة ووزنها بيبقى محدد.




امثلة للشركات ديه



ryanair , wizz air, easy jet





المتطلبات بتاعة الشنط بتبقى موجودة على الموقع بتاع كل شركة طيران وخد بالك انك قبل ما تدخل الطيارة بيبقى فى ستاند بتحط فيه الشنطة بتاعتك عشان يشوف مقاسها مظبوط ولا لا ولو مش مظبوط بتدفع فلوس زيادة "غالبا بتبقى فلوس كتيرة" ودة شكل الستاندات



يعنى مثلا انا سافرت مع شركة ويز اير من فرنسا لبولندا (من الغرب للشرق) ب 350 جنيه بس انا لما بسافر اوروبا بسافر خفيف يعنى المرة اللى فاتت سافرت بالشنطة ديه



وعلى فكرة فى طرق لل packing هنتكلم عليها فى بوست تانى عشان تقدر تاخد كل اللى محتاجة فى شنطة زى ديه وكمان هتلاقى فى اى هوستل فى خدمة لغسيل الهدوم ودة اللى بيخليك تقدر تسافر خفيف زى مانا بعمل

===============================================
فى بقى شوية مواقع تانية برضه مساعده للبحث عن التذاكر الرخيصة
من اهمها



انا عن نفسى بفضل الموقع دة فى البحث عن تذاكر ال one way .... ممتاز جدا لانك بتختارهتطلع من مطار معين وبيتيحلك انك تختار كمان من المطارات القريبة من المطار دة ونفس النظام فى المطار اللى هتنزل فيه وبيجيبلك ارخص الرحلات فى الفترة اللى بتختارها لو ظبطت الاعدادات زى مانا عامل فى الصورة

وبالتالى الموقع دة ممكن يساعدك فى انك تدور على تذكرة رايحة لمكان معين وتذكرة العودة من مكان تانى وبدل ما تزور مكان واحد بس ... يبقى زرت مكانين فى اوروبا فى نفس الرحلة

بعد ما تخلص بحث فى سكاى سكانر ممكن تستخدم الموقع دة لانه ساعات بيجيب تذاكر مش موجودة على سكاى سكانر وتقدر توفر اكتر ;)

================================================
فى بقى 3 مواقع تانين برضه مساعدين لو عاوز تجربهم هم



المواقع ديه طالما معاك يبقى تضمن ان هتجيب اى تذكرة من اى حتة لاى حتة بارخص سعر واحسن من اى شركة سياحة
================================================
نصيحة اخيرة وانت بتدور على ال tickets يا ريت لو تدور وانت عامل البراوسر incognito mode لان تقريبا دة بيقلل من انتشار التذكرة اللى انت بتدور عليها وبالتالى بيقلل احتمالية انها تغلى فى المستقبل

شارك الموضوع

فيزا الشنجن

 فيزا الشنجن

هل تعلم انك ممكن تطلع فيزا شنجن لزيارة اى بلد فى اوروبا ب 650 جنيه بس

بص يا سيدى الفيزا الشنجن من الاخر عبارة عن ورقيات مش اكتر. جهزت ورقك مظبوط يبقى هتطلعها وبكل سهولة.

اولا ايه هى بلاد الشنجن اللى مشتركة فى نفس الفيزا؟

البلاد اللى فى الصورة ديه كلهم فى الاتحاد الاوروبى ومفيش اى حدود ما بينهم وبالتالى  الفيزا بتاعتهم مشتركة ودة الجميل فى الاتحاد الاوروبى, انك ممكن فى رحلة واحدة تروح 3 او 4 بلاد وبفيزا واحدة .

انا عن نفسى لما باقدم على فيزا لاوروبا باختار دولة مش مشهورة وكل من هب ودب بيقدم فيها, اولا عشان الاجراءات هتكون اسهل وساعات اسرع وثانيا فرصة قبولها بتبقى اكبر بكتير.


يعنى مثلا اخر مرة انا طلعت الفيزا من بولندا وسافرت بولندا يومين بس وباقى ال18 يوم فى بلاد تانية منهم فرنسا واسبانيا مثلا.


اهم حاجة فى الموضوع انك تبدا فى الفيزا بدرى .... يعنى لو عرفت تبدا فيها قبل ميعاد السفر ب 3 شهور او شهرين يبقى زى الفل ودة هيسهلك انك تشترى تذاكر طيران رخيصة (ودة هنشرحه فى بوست لوحده)
الفيزا سهلة ان شاء الله بس انا هكتب كل حاجة بالتفصيل فممكن تبان صعبة بس دة عشان كل الناس لما تقدم تبقى متاكدة 100 فى ال 100 ان الطلب مش هيترفض .... ممكن يكون فى ناس بتتقبل من غير ما تعمل اللى انا بقول عليه بس لو عملت اللى انا كاتبه يبقى بنسبة كبيرة جدا هتطلعلك الفيزا ان شاء الله.




الاوراق المطلوبة( كلها بالانجليزى ولو مش انجليزى ترجمها من اى مركز ترجمة معتمد ):
==============================================
  باسبور
تاريخ الانتهاء بتاعه فاضل عليه اكتر من 6 شهور.
========================================================================
شهادة تحركات لاخر 7 سنين 
   ديه بتتعمل من مجمع التحرير ويا ريت تبدأ بيها لانها بتاخد 15 او 20 يوم على ما بتطلع ( من ضمن الورق اللى ملوش لازمة بس لازم تقدمه )
========================================================================
 تامين صحى للاتحاد الاوروبى  بحد ادنى 30 الف يورو 
     ودة اسمه يخض بس هو عبارة عن انك بتعمل ورقة تامين صحى من اى شركة سياحة او شركة تامين صحى بتبقى تامين للسفر لاوروبا ولو هتعمله لمدة شهر مثلا  ( حسب مدة السفرية قد ايه ) بتتكلف تقريبا 100 جنيه ( انا بعمله دايما من شركة Allianz بتبقى سعرها رخيص بالمقارنة مع باقى الشركات )
========================================================================
 حجز طيران مبداى
 ودة بتتصل بمصر للطيران وتقوله عاوز حجز طيران مبداى من يوم كذا ليوم كذا للدولة اللى انت هتقدم فيها 
على الفيزا وبيبعتهالك على الميل بتاعك تطبعها وتقدمها وببلاش وممكن تعملها من شركة سياحة برضه ببلاش او ب 10 جنيه مثلا .. بس ليه تعملها بفلوس لما ممكن تعملها ببلاش 


ملناش دعوة انت هتسافر فين تانى, دة دلوقتى تخليص ورق للفيزا يبقى تقول انك رايح الدولة ديه بس ... انما السفر نفسه هيبقى ليه ترتيب لوحده ليك انت,هم ملهومش دعوة بيه .... اهم حاجة التواريخ عشان الفيزا هتطلع على التاريخ اللى مكتوب فى الحجز دة 

=====================================================================

 حجز فندق  

بص يا سيدى فى فنادق بتعمل فيها حجز ومن غير ما تدفع ولا مليم وبتلغيه اول ما تطلع الفيزا زى مثلا سلسلة فنادق موجودة فى كل اوروبا اسمها
IBIS 




هتدخل تعمل حجز فى اى فندق من الموقع بتاعهم 




 اختار ارخص واحد عشان تقدر تثبتلهم فى السفارة انك قادر تقعد فى فندق زى دة   وهيتبعتلك الحجز على الميل ببلاش واطبعه ولو طلب منك ماستركارد او فيزا كارد متقلقش اكتبه ومش هيخصم اى حاجة بس تلغى الحجز قبل ميعاد الوصول باسبوع مثلا.



طب بلاش كدة ممكن برضه تحجز من على 


فى فنادق هناك بتكون سامحة انك تلغى الحجز قبلها ب 48 ساعة مثلا بدون ما يخصم منك اى فلوس (بتبقى مكتوبة فى التفاصيل بتاعة الفندق وبرضه اختار ارخص فندق )  بس لازم تحط رقم الفيزاكارد بتاعتك او كارت الايه تى ام لما تيجى تحجز على بوكينج بس متخافش مش هياخد منك اى فلوس الا قبلها ب48 ساعة لو ملغتش الحجز قبل الميعاد المكتوب



==========================================================================

     كشف حساب بنكى لاخر 3 او 6 شهور
      ودة عشان يعرف انت هتقدر تسافر السفرية ديه ولا معكش فلوس تكفى  ودة برضه ليه طريقة انا بستخدمها عشان اتاكد ان طلبى مش هيترفض
         (كشف الحساب بيبقى ليك او لوالدك او والدتك لو هتكتب فى الابليكيشن ان هم اللى هيدفعولك وديه برضه تخليص ورق وملهاش دعوة بالحقيقة اختار اللى هيكون مضمون اكتر, فى مرة مثلا مع ان انا كنت بشتغل بس كتبت والدى هو اللى هيدفع لان مكنش فى الحساب بتاعى فلوس تكفى )
             اولا عشان تعرف هم عاوزين قد ايه فى حسابك هنعمل حسبة صغيرة اوى بص يا سيدى 

هو عاوز فى حسابك فلوس للفندق ( عشان كدة بنختار واحد رخيص ) + فلوس لتذكرة الطيران + فلوس للمعيشة فى البلد اللى انت رايحها



          بالنسبة لفلوس المعيشة ديه بتختلف من بلد لبلد والاتحاد الاوروبى عامل زى قايمة فيها كل بلد محتاجة كام يورو فى اليوم عشان تقدر تعيش فيها وبتتراوح من 50 يورو الى 100 او 150 يورو فى اليوم حسب انت مقدم فى انهى سفارة .... ودة اللى بيخلينى اقدم فى سفارة لبلد مش مشهورة اوى ولا اقتصاديا جامدة عشان يكون مثلا المعيشة فيها ب 50 يورو فى اليوم وانا لو هقعد اسبوع يبقى محتاج 350 يورو فى حسابى يعنى تقريبا 3500 جنيه بالاضافة للفلوس بتاعة الفندق والتذكرة بتاعة السفر يعنى تقفلها فى الاخر بتاع 15 الف اروح انا اظبط الحساب على25 او 30 الف مثلا (زودت على اللى هو محتاجه كمان ) يبقى كدة هو شايف انى اقدر فعلا اسافر السفرية ديه ( ملهاش دعوة باللى انت هتصرفه فعلا ... فى بوستات تانية ان شاء الله هوريكوا ان المصاريف اقل من كدة بكتير )



    وديه القايمة بتاعة مصاريف المعيشة فى كل بلد وكل سنة بتتغير على فكرة




=====================================================================


   لو انت شغال HR Letter ولو انت طالب يبقى خطاب قيد من الجامعة


ودة عشان يتاكد انك هترجع تانى بعد اما تسافر .... يعنى فى حاجة رابطاك فى مصر. 

بالنسبة للاتش ار ليتر يا ريت يبقى مكتوب فيه انك اجازة فى الفترة اللى هتسافر فيها ومكتوب فيه المسمى الوظيفى والمرتب.

========================================================================


  صور حديثة :

      انزل على اى ستديو للتصوير وقوله عاوزك تصورنى لفيزا الشنجن .... وهم حافظين الابعاد والمطلوب فى الصورة بالظبط.





وهو دة كل الورق المطلوب للفيزا

 هتحجز ميعاد فى السفارة وتقدم الورق وتروح عشان الانترفيو وطالما ورقك كامل ومجهز انت رايح هتعمل ايه فى البلد اللى انت رايحها ديه يبقى معندهمش اى سبب انهم يرفضوا الفيزا
========================================================================


ملحوظة 1

             لما هتاخد الفيزا هتبدا تخطط للرحلة بتاعتك بجد .... وكل ما تبدا بدرى كل ما هتوفر فى الفلوس اكتر بالذات فى تذكرة الطيران ....الفيزا عشان تخلص بتاخد تقريبا من اسبوعين ل 3 اسابيع بعد ما تقدم الورق و تمنها 550 جنيه مع 100 جنيه فلوس التامين الصحى يبقى كدة 650 جنيه تمن الفيزا ;)

ملحوظة 2

               الفيزا ميعاد بدايتها بتعتمد على التواريخ اللى مكتوبة فى حجز الطيران المبداى ومدتها على التامين الصحى ومدته .... خد بالك انك لو هتسافر يوم الجمعة الساعة 11 ونص بالليل مثلا من مصر وهتوصل اوروبا يوم السبت .... يبقى الفيزا لازم تبدا من يوم الجمعة مش من يوم السبت فخد بالك وانت بتعمل الورق وظبطه زى ما انت عاوز.

ملحوظة 3

                القانون بيقول ان الفيزا المفروض تطلع من سفارة البلد اللى هتقعد فيها اكبر فترة من اقامتك فى اوروبا ولو هتقعد فى كل البلاد نفس الفترة يبقى تطلعها من سفارة اول بلد طيارتك هتنزل فيها.

               بس بما ان مفيش اى رقابة على الحدود بين البلاد فبالتالى هو مش هيعرف انت هتقعد فى انهى بلد اكتر وقت وبالتالى القانون دة فى البلالا .... بس لو خايف وعاوز تبقى فى ال safe side  لو انت هتسافر على المانيا مثلا وانت واخد الفيزا من بلد تانية خلى معاك اثبات انك رايح البلد التانية ديه ( حجز فندق مثلا او حجز طيران ) عشان لو سالوك هناك ..... ( انا مرتين خدت الفيزا من بلد ودخلت اوروبا من بلد تانية وولا حد سالنى فى اى حاجة .... لان هناك الدنيا اسهل من هنا بكتيييير )

و       الدليل ان هناك الدنيا سهلة ان فى الشارع ممنوع على الشرطة انها تسالك فين الباسبور بتاعك الا بس لو انت عملت مشكلة مع حد .... يعنى مفيش عقد زى اللى هنا فى مصر.

ملحوظة 4

              لو انت مقيم فى بلد غير مصر وهتقدم فى السفارة هناك يبقى مش هتحتاج شهادة التحركات بتاعة مجمع التحرير بس هتحتاج الاقامة بتاعة البلد اللى انت فيها يكون تاريخ الانتهاء بتاعها فاضل عليه اكتر من 3 شهور واتصل اتاكد من السفارة لو فى حاجة تانى مطلوبة.

ملحوظة 5

                    فى اللستة بتاعة مصاريف الاقامة فى كل بلد مكتوب انها شاملة للاقامة .... بس انا بضيف للحسبة فلوس الفندق برضه زيادة تاكيد.

شارك الموضوع

جميع الحقوق محفوظة © Travel Bel Masry مقدم منعرب ويب