الاقامة فى اوروبا
(فى اخر البوست فى طريقة انك تقعد فى اوروبا ببلاش )
بيقولوا ان الفنادق فى اوروبا غالية .... ودة كلام مظبوط فعلا
بس الفنادق معمولة للناس الفرافير .... اللى حابب فعلا يجرب احساس الترافلر يبقى عمره ما هينزل فى فندق
اى شاب فى العالم لما بيسافر بيسافر يقعد فى هوستل (بيت شباب) سواء ولد او بنت او حتى لو مجموعة مسافرة مع بعض وعلى فكرة دلوقتى كمان مش الشباب بس اللى بتقعد فى هوستل ... مثلا فى برشلونة قابلت راجل فى الاربعينات وكان نازل فى هوستل معانا عادى جدا عشان جاى يحضر ماتش لبرشلونة فى الكامب نو.
بس فى البوست دة احنا مش هنتكلم بس على الهوستل هنتكلم برضه عن ايجار الشقق اواوضه فى شقة وبرضه عن الاقامة ببلاش ...وهنقدم كل الحلول الموفرة للاقامة سواء كنت مسافر لوحدك ولد او بنت او مع جروب او لو مجموعة بنات مع بعضها.
========================================================================
Hostels
الهوستل فى اوروبا الليلة بتتراوح بين 10 او 15 يورو لحد 30 يورو فى اليوم
الصورة اللى فى اول الموضوع ديه مش لفندق ... دة هوستل فى سلوفاكيا
والصور ديه لهوستل تانى فى باريس
طبعا زى مانتوا شايفين فى هوستلز بتبقى عاملة زى الفنادق ... مش معنى انها رخيصة انها وحشة بس اكيد فى هوستل تانية بتبقى مش جامدة بس معقولة برضه
انا عن نفسى بفضل الهوستل عن اى نوع تانى من الاقامة
لانك بتقعد فى الاوضة مع ناس مختلفة عنك كتير وبتعمل صحاب كتير وحقيقى لو انت مسافر لوحدك يبقى دة انسب حاجة ليك, هتتعرف على ثقافات تانية وهتتعلم كتير اوى وهيبقى ليك صحاب فى كل حتة فى العالم ...
وعلى فكرة امان جدا .... لانك بيبقى ليك لوكر فى الاوضة بقفل تحط فيه كل حاجاتك.
دة مثلا الهوستل بتاع باريس ليك سريرك وتحت مثلا فيه درج كبير بقفل تحط فيه كل حاجتك
ويا سلام لو حصلك زيى و توصل بالليل والدنيا ضلمة وتصحى الصبح تتفاجئ بالمنظر دة قدامك
بما ان باريس اغلى مكان فى العالم (بيقال كدة) وانك تقعد فى مكان زى دة ب 25 يورو فى اليوم شامل الفطار ....فدة اكيد حاجة زى الفل
ممكن تقعد فى مكان تانى ويكون ارخص من كدة بكتير ....يعنى مثلا انا وصلت مرة انى قعدت فى هوستل فى بولندا ب 6 يورو فى اليوم يعنى تقريبا 50 جنيه فى اليوم ودة عشان شرق اوروبا والدنيا هناك ارخص من الغرب
========================================================================
بس لازم الاول نعرف الفرق بين نوعين من الغرف فى الهوستل
1)Private room:
وديه عبارة عن اوضه خاصة ... زى الاوتيل بالظبط بس بتبقى اقل فى السعر... وساعات كمان بتكون بنفس سعر الاوتيل لان زى مانتوا شايفين فى هوستلز فعلا بقت الجودة بتاعتها عالية جدا
بس برضه فى انواع من الغرف الخاصة زى ديه بتبقى موفرة لو انتوا مسافرين كمجموعة 4 اشخاص مثلا مع بعض ومش عاوزين يبقى معاكوا حد غريب فى الاوضة ويبقى التكلفة قليلة ... فديه من ضمن الاختيارات اللى هتبقى موفرة جدا للمجموعات.
2)Droms
وديه هى الغرف المشتركة اللى اتكلمنا عليها فى الاول وممكن يبقى فيها 4 اشخاص او 8 او12 او 16 على حسب السعر وعلى فكرة فى هوستلز كمان بتبقى عاملة اختيار للبنات مخصوص انهم يقعدوا فى غرف زى ديه وتبقى للبنات بس
=======================================================================
انا بستخدم الموقع دة فى حجز الهوستل وهو الاشهر
معايير اختيار الهوستل
اول حاجة هتكتب المكان اللى هتسافر ليه والتواريخ اللى هتسافر فيها ... هيظهر شوية هوستلز فى الاول ودول اللى الموقع بيرشحهم (اكتر هوستلز الناس بتشكر فيها ) وساعات بيبقى سعرها اغلى شوية عن الباقى
الموقع بيتيحلك انك ترتبهم على اساس السعراو التقييم الكلى حسب رؤيتك انت
بس الاهم من التقييم الكلى واهم معايير هى الاتى
عدد الناس اللى قيمت المكان لان ممكن يكون تقييم عالى بس اتنين بس اللى قيموه
--------------------
التقييمات اللى بتبقى على اليمين الخاصة بالامن والنضافة والموقع
---------------------
الريفيوز لازم تدخل عليها وتقراها وتشوف هل فى كومنتات سيئة عن المكان ولو فى هل دة شئ متكرر من كذا واحد ولا هو واحد او اتنين بس
----------------------
المكان بتاع الهوستل بعيد عن وسط المدينة ولا لا .... ودة بتعرفه عن طريق انك تدخل على
Maps and direction
وهتلاقى معلومات عن ازاى توصله سواء من المطار او من محطة القطر ولو مش واضح ممكن تدخل على الخريطة فى جوجل ماب و تشوف المسافة بينه وبين محطة القطر الرئيسية فى المدينة
------------------------
المكان فيه واى فاى وببلاش ولا لا (من اهم الحاجات اللى تشوفها)هتلاقيها فى ال
facilities
---------------------------
هل الريسيبشن متاح 24 ساعة ولا لا ... عشان ساعات فى هوستلز بتقفل بالليل ودة برضه من اهم الحاجات اللى تشوفها مع الواى فاى
--------------------------
هل فى لوكرز ولا مفيش عشان تحط فيها حاجتك
---------------------------
هل فى خدمة غسيل الهدوم ولا لا وهل فى مطبخ مشترك عشان لو فكرت مثلا تطبخ انت عشان لو قاعد فترة كبيرة وعاوز توفر شوية فلوس
========================================================================
Rent
الايجار
ودة عن طريق ان واحد من اهل المدينة بيعرض اوضه فى شقته وممكن شقة كاملة للايجار لمدة قصيرة.
الميزة فى الطريقة ديه انك لو مسافر مع مجموعة فانت ممكن تؤجر شقة وتقسموا الفلوس عليكوا وساعات بتبقى ارخص من الهوستل كمان
وبرضه بالنسبة للبنات لو مجموعة هتبقى مناسبة ليهم اكتر انهم يؤجروا شقة كاملة وهتبقى الخصوصية فيها عالية عن اى مكان تانى
واشهر موقع للتاجير هو موقع
airbnb.com
دة لينك للتسجيل فى الموقع عن طريقى وهتلاقى منى هدية فى الاكونت 20 دولار تصرفهم فى السفرية الجاية ;) ملكش حجة بقى
بتكتب برضه المكان اللى انت مسافر ليه وعدد المسافرين والتواريخ وهتلاقى ظهرلك كل الاختيارات اللى موجودة فى المدينة ديه مع مكانها على الخريطة
ظبط السعر على حسب ما انت عامل حسابك واختار عاوز شقة كاملة ولا اوضة فى شقة ولا ايه بالظبط و بعد كدة شوف الاختيارات اللى قدامك ايه وتقف على كل شقة وتشوفها على الخريطة مكانها فى وسط المدينة ولا بعيد وتحاول تختار الاقرب للمدينة والمناسب اكتر لميزانيتك
فمثلا انا عملت بحث فى باريس ل 4 اشخاص شقة كاملة ولقيت الاعلان دة
فى الخريطة واضح انه تقريبا فى وسط باريس وفى 52 ريفيوز للمكان (يعنى 52 واحد كاتبين رايهم بعد ما جربوه )وبالتالى اقدر اقيم المكان كويس
اول حاجة هنشوف تكلفة ال 3 ليالى هتلاقيها 235 دولار يعنى 1840 جنيه على الاربعة 450 جنيه .... يعنى الليلة هتقف على الفرد ب 150 جنيه وماجرين شقة من بابها فى باريس من اغلى المدن فى العالم
ودى صور للشقة بالتقييمات
اقرا الكلام اللى مكتوب فى الاعلان كله وركز فيه وشوف هل فى انترنت ولا لا ومواعيد التشيك ان والكلام دة وكمان ادخل على بروفايل الشخص نفسه وشوف الموقع بيبقى عامل شوية طرق عشان يتاكد من البيانات اقراها وقيم انت بنفسك البروفايل
================================================
اخر طريقة وهى السكن ببلاش فى اوروبا
Couch surfing
والطريقة ديه بكل بساطة انك بتدخل على موقع للترافلرز اللى بيسافروا كتير بتبقى عارضة انها تستقبل اى شخص مسافر ويبات على الكنبة عندهم وهم برضه لما بيسافروا بيستفادوا انهم بيقعدوا عند ناس تانية ببلاش وهكذا.
ودة ميزته انك بتقعد مع اهل المدينة وتختبر المدينة بطريقة مختلفة عكس اى سائح
الموقع اسمه
الموقع زمان مكنش بياخد اى فلوس بس دلوقتى عشان يقننوا الموضوع بقى فى فلوس بتدفعها لو انت عاوز الاكونت بتاعك يتكتب عليه انك مضمون ودة بيخلى الناس تقبل انها تستقبلك اسرع من الناس اللى مش مكتوب على الاكونت بتاعها انها مضمونة
بتعمل اكونت عليه وتكتب عن نفسك وشخصيتك وبعد كدة فى البحث بتكتب برضه المكان اللى انت هتسافره وبيظهرلك ناس كتير عارضه انها تستقبل مسافرين بس لازم تقرا البروفايل كويس جدا لان دلوقتى كمان بقوا بيحطوا كلمة سر فى البروفايل لازم تكتبها لما تيجى تبعتله طلب اقامة عنده ونصيحة برضه حاول تخلى المسدج اللى هتبعتهاله تبقى معمولة مخصوص ليه ... مش كوبى بيست لكل الاشخاص بنفس الرسالة .... يعنى بعد ما تقرا الاكونت تحاول تقوله انك شفته كاتب كذا وكذا وانك برضه مثلا بتحب كذا وكذا .... دة بيخلى نسبة القبول اعلى من العادى
انا الصراحة جربت الكلام دة مرة واحدة بس عشان اشوف الدنيا عاملة ازاى وفعلا حد قبل استقبالى على الرغم انى مدفعتش ولا حاجة للموقع بس بعد ما رحت البيت ملقتش حد فى البيت فى الوقت اللى انا وصلت فيه فطلعت على اقرب ماكدونالدز عشان استخدم الواى فاى واحجز هوستل وقلت مش عاوز اجرب حاجة
:D :D :D
فلازم لو هتختار الاختيار دة يبقى عندك باك اب بلان عشان لو حصل فى الامور امور تبقى انت جاهز على طول.
================================================
لو فى اى استفسارات يا ريت تكتبوها فى الكومنتات وديه كل الطرق اللى اكتشفتها لحد دلوقتى ولو اكتشفت اى حاجة جديدة هضيفها هنا على نفس الموضوع ان شاء الله
تابعنا